今朝實測PG4，著上腳嘅第一個感覺，係貼腳，係 · 極 · 度 · 貼 · 嗰 · 一 · 種。所以買嘅時候一定一定一定要試清楚；唔嫌麻煩嘅話，我直頭覺得要帶埋你著開嚟打波嘅波襪去試。買大半號走唔甩。
貼腳，主要原因係內櫳腳後跟位做得勁厚，舒服之餘再將你隻腳迫向前包到冚一冚，呢個係低筒鞋一貫嘅保護手法；緩震由發泡中㡳加全鞋長嘅air組成，軟硬度我會稱之為適中，唔似KD 12咁軟腍腍，但又冇Kyrie 6咁硬淨，總之夠用有突。我估係為咗配合番Paul George嘅搖擺人位置，所以配置上唔會走向極端；咬地力係最驚喜嘅地方，而家啲室內場都多塵，但係練咗兩個鐘之後跣都未跣過，依然話停就停。
至於網面同拉鍊設計，我就覺得實際用途唔算太大。不過PG系列配色一向精彩，多埋網面拉鍊，遲啲應該有更多花臣可以玩。講真，$849呢個價位嘅籃球鞋，我講到佢識飛你都當我吹水啦，但綜觀表現，佢絕對對得住個售價，性價比夠高；街場鞋王之爭，Zoom Freak 1有對手喇。
#PG4
#PaulGeorge
#NikeBasketballHK
Search